د خوست ولایت په مرکز کې ۴۰۰ کورنیو او ۱۲۰۰ زدهکوونکو ته د څښلو پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظ الصحې د پروګرام له لوري د خوست مرکز اړوند د کنډیو په ستر کلي کې د اوبو رسولو یوه لمریزه شبکه د څلور میلیونه افغانیو په لګښت جوړه او د سیمې د خلکو ګټې اخیستنې ته وسپارل شوه.
په دغه پروژه کې د یوې ژورې څاه کیندل، د ۳ زره مترو په اوږدوالي د پایپونو د شبکې غځول، د ۲۰ زره لېتره په ظرفیت سره د یوې ارتفاعي ذخیرې او د کنډیو دنجونو په ښوونځي کې د یوې بلې ۶ زره لېتره د اوبو ذخیرې جوړول، د ۳۰ سولري تختو او ۸۴ نلبندانونو نصبول شامل و.
د یادې شوې پروژې په جوړېدو سره د کنډو د سترکلي د ۴۰۰ کورنیو او د کنډیو د نجونو ښوونځي ۱۲۰۰زده کوونکو لپاره د څښلو پاکې اوبه برابرې شوې.
