په پکتیکا ولایت کې د څښاک پاکو اوبو رسولو (۴۲) شبکو د جوړولو چارې پیل شوې
د کليو د بيارغونې او پراختيا وزارت د محترم وزير الحاج ملا محمد یونس اخندزاده صاحب له خوا د پکتیکا ولایت په ګومل، وازې خوا، ډیله، خوشامند، جاني خیلو، چهاربران او شکین ولسوالیو کې د څه باندې (۲۰۱) میلیونه افغانیو په لګښت د څښاک پاکو اوبو رسولو (۴۲) شبکو د جوړولو چارې نن د يوې غونډې په ترڅ کې پيل شوې.
په دې غونډه کې د کليو د بيارغونې او پراختيا وزارت محترم وزير الحاج ملا محمد یونس اخندزاده صاحب، مل پلاوي، د پکتیکا ولایت والي الحاج مولوي عبدالخالق عابد صاحب، د ياد ولايت د کليو د بيارغونې او پراختيا رياست رئيس مولوي احسان الله احمد، یو شمېر نورو مسئولینو، علماء کرامو، سپین ږیرو او ځوانانو ګډون کړی وو.
د يادو شبکو د کار په بهير کې به سلګونه تنه کاريګرو ته د کار زمينه برابره او په بشپړېدو سره به یې شاوخوا (۵۶) زره کسان د څښاک پاکو اوبو ته لاسرسی پيدا کړي.
