په پکتیا کې د ۱.۸ میلیونه افغانیو په ارزښت ۳۰۰ متره اوږد کانال جوړ شو
د کلیو بیارغونې او پراختیا وزارت د ولسي تړون ملي پروګرام له لوري د پکتیا ولایت د شواک ولسوالۍ اړوند د غونډۍ کلي پراختيايي شورا لخوا د ۱.۸ میلیونه افغانیو په ارزښت ۳۰۰ متره اوږد او۷۰ سانتی متره لوړ کرنيز کانال جوړ شو.
یاد کانال ۲۷۰ جريبه کرنيزه ځمکه خړوبوي او ۸۷ کورنۍ ترې ګټه اخلي، ددې پروژې په ترڅ کې ځایي تخنیکي او نا تخنیکي کاریګرو لپاره ۲۰۳۴ کاري ورځې هم برابری شوې.
د پکتیا شواک ولسوالۍ لپاره د ولسي تړون ملي پروګرام له لوري د اوبولګونې، څښاک پاکو اوبو ته د لاسرسي، لمريزې برېښنا او ټرانسپورټ په سکټورونو کې ۲۵ پروژې منظور شوي، چې د يو شمېر هغو رغنیزې چارې بشپړې او پاتې نورې به يې په نږدې راتلونکي کې تکمیل او ګټه اخيستنې ته وسپارل شي.
