د کلیو د بیارغونې او پراختیا وزارت له لوري په کندز ولایت کې (۹) چیک ډیمونه جوړیږي
د کلیو د بیارغونې او پراختیا وزارت له لوري د کندز ولایت په بیلابیلو ولسوالیو کې د څه باندې (٣۰) میلیونه افغانیو په لګښت (۹) چیک ډیمونه جوړیږي، چې له جملې څخه يې نن د یاد وزارت د سرپرست الحاج ملا محمد یونس اخندازده او مل پلاوي له لوري د دغه ولایت په شپږو ولسوالیو کې د (۶) چیکډیمونو چارې نن د یو لړ مراسمو په ترڅ کې عملا پيل شوې.
په یاده غونډه کې د کلیو د بیارغونې او پراختیا وزارت سرپرست وزير الحاج ملا محمد یونس اخندزاده، مل پلاوي، د کندز ولايت د والي د دفتر رئيس مولوي عبدالغفور شهيدزی، د امام صاحب ولسوالۍ ولسوال مولوي ګل محمد الياس، د دغه ولايت د کليو د بيارغونې او پراختيا رئيس مولوي اسدالله حامد، د سیمې علماء کرامو، سپین ږیرو، مخورو او ځوانانو ګډون کړی وو.
د یادو چیکډیمونو د کار په جریان کې به د سیمې سلګونه تنه کاریګرو ته د کار زمینه برابره شې او په جوړیدو سره به يې د نوموړو ولسوالیو د باران اوبه مهار او د ځمکې لاندې اوبو سطحه به برقراره وساتل شي.
