د کلیو د بیارغونې او پراختیا وزارت له لوري د مؤسساتو له استازو سره د همغږۍ غونډه ترسره شوه
د کلیو د بیارغونې او پراختیا وزارت د سرپرست وزیر الحاج ملا محمد یونس اخندزاده په مشري نن له غرمې مخکې د مؤسساتو له استازو سره د همغږۍ غونډه ترسره شوه.
په یاده غونډه کې چې د کلیو د بیارغونې او پراختیا وزارت په مقر کې جوړه شوې وه، د یاد وزارت سرپرست وزیر الحاج ملا محمد یونس اخندزاده، مرکزي رئیسانو، د یونیسف دفتر د واش څانګې مسوول رولف لویندیک، د عامې روغتیا او پوهنې وزارتونو او مؤسساتو استازو ګډون کړی وو.
د غونډې په پیل کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده صاحب میلمنو ته د ښه راغلاست ترڅنګ، د یادې غونډې د اهمیت په اړه خپله ارزښتناکه وینا وکړه او وویل: زموږ مسوولیت دا دی ترڅو پروژې په یو داسې ځای کې پلي کړو چې د مظلومو او ستړو افغانانو د درد دوا شي او کوښښ به مو دا وي چې مستحقو خلکو ته پروژې ورسوو او ټولګټې خدمات وړاندې کړو.
دغه راز محترم وزیر صاحب متوازن انکشاف ته اشاره وکړه او زیاته یې کړه چې پراختیايي پروژې باید د خلکو د اړتیاوو په اساس تطبیق شي او د کلیو د بیارغونې او پراختیا وزارت دا هوډ لري ترڅو د هېوادوالو ستونزو ته پر وخت رسیدنه وکړي.
همداراز د مؤسساتو د استازو خبرې په غور واوریدل شوې او غونډه د دعائیې په ویلو سره پای ته ورسیده.
