په ننګرهار ولایت کې د پاکو اوبو رسولو (۲۷) شبکې ګټې اخیستنې ته وسپارل شوې
د کليو د بيارغونې او پراختيا وزارت له لوري د ننګرهار ولايت په( ۱۷) ولسواليو او د تورخم سیمې په عمري کمپ کې د يوې لوی شبکې په ګډون د( ۱۴۸ )ميليونه افغانيو په لګښت د څښاک پاکو اوبو رسولو (۲۷) شبکو د جوړولو چارې بشپړې او نن د يوې غونډې په ترڅ کې د دغه وزارت محترم وزير الحاج ملا محمد يونس اخندزاده صاحب له خوا ګټې اخيستنې ته وسپارل شوې.
په دې غونډه کې د کلیو د بیارغونې او پراختیا وزارت محترم وزیر صاحب، مل پلاوي، د ننګرهار ولایت والي الحاج ملا ګل محمد اخند، د عمري کمپ مسوول مولوي محمد هاشم ميوندوال، د دغه ولایت د عامې روغتيا رئیس مولوي امين الله شريف، د یاد ولایت د کلیو د بیارغونې او پراختیا رئيس مولوي قسمت الله مبارز، د دغه ولایت یو شمیر نورو مسؤولینو، علماء کرامو، سپین ږیرو او ځوانانو ګډون کړی وو.
په یاده غونډه کې الحاج ملا محمد یونس اخندزاده صاحب خپله ارزښتناکه وینا وکړه او وویل: موږ به د خپل مسووليت له مخې د بيا راستنيدونکو کډوالو لپاره د عمري کمپ په شان به په نورو کمپونو کې هم د څښاک پاکو اوبو زمينه برابروو او دا د خوښي ځای دی چې د ننګرهار ولایت په (۱۷) ولسواليو کې زرګونه کسانو ته د پاکو اوبو زمينه برابره شوه،
وزير صاحب زياته کړ مونږ به د هيواد د هغه اوسيدونکو لپاره چې د پاکو اوبو له نشتوالي سره مخ دي د پاکو اوبو زمينه برابرو.
د یادو شبکو په بشپړیدو سره د نوموړي ولایت زرګونه کورنیو د څښاک پاکو اوبو ته لاسرسی پيدا کړ.
