د کلیو د بیارغونې او پراختیا وزارت سرپرست د بدخشان ولایت د واخان ولسوالۍ له اوسیدونکو سره وکتل
د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده د بدخشان ولایت واخان ولسوالۍ ته د خپل کاري سفر په ترڅ کې د واخان ولسوالۍ له اوسیدونکو او د بزای ګنبد سیمې د قرغيزو قوم سره لیدنه وکړه.
په یاده لیدنه کې محترم وزیر صاحب د يادي سيمې د اوسیدونکو ستونزې او وړاندیزونه په غور سره واوریدل او ويې ويل چې اسلامي امارت د هېواد ټولو کلیو ته په ځانګړې توګه محرومو او له اسانتیاوو څخه لرې سیمو ته خاصه پاملرنه لري.
دغه سيمه د کوچني پامیر یو له لرې پرتو او د هیڅ ډول امکاناتو پرته سيمو څخه ده، چې اوسیدونکي يې قرغيز دي او په قرمزي ژبه خبرې کوي. دوی لومړنیو خدمتونو ته لکه ښوونځي، کلینیک، سړکونو او نورو اسانتیاوو ته لاسرسی نه لري .
د یادو سیمو اوسیدونکو د کلیو د بیارغونې او پراختیا وزارت سرپرست الحاج ملا محمد یونس اخندزاده په راتګ خوښي وښوده او ویې ویل چې په تیرو څلويښتو کلونو کې د واخان ولسوالۍ په کوچني پامیر کې د خلکو د ستونزو د هوارولو لپاره تیر ۴۰کاله هیڅ دولتي مقام نه دی راغلی، ستاسو راتګ دلته د پراختیايي ښو بدلونونو هیله مندي رامنځته کوي.
او ستاسو دغه سفر مونږ ته هیله او انرژي راپه برخه کوي چې تاسې د هېواد لرو پرتو سیمو ته په ځانګړې توګه واخان ولسوالۍ ته پاملرنه لرئ او د نوموړي ولسوالۍ خلک مو هیر کړي نه دي او موږ ستاسو دوامدره همکاري غواړو.
