په تخار کې د ۶.۱ میلیونه افغانیو په ارزښت د اوبو رسولو یوه شبکه جوړه شوه
د کلیو بیا رغونې او پراختیا وزارت د اوبو رسولو او کلیوالي حفظ الصحې ملي پروګرام له لوري د تخار ولایت د مرکز تالقان ښار په اق بلاق سر ایسنګ کلي کې د ۶.۱ میلیونه افغانیو په ارزښت د اوبو رسولو یوه شبکه بشپړه او ګټې اخیستنې ته وسپارل شوه.
دا شبکه یوه هسکه زیرمه، ژوره څاه، ۴۰ سولري ښیښې، ۴۷۶۹ متره پایپ او ۲۳۰ نلکې لري.
د دې پروژې په ترڅ کې د سیمې خلکو ته ۳۲۰۰ کاري ورځې رامنځ ته شوې وې چې په بشپړتیا سره یې ۴۲۰ کورنۍ له پاکو او صحي اوبو برخمنې شوې.
د سیمې د پرمختیايي شورا رییس احسان الله وویل چې دوی له ۳ کیلو متره لرې واټن څخه په خرو اوبه راوړې چې هغه هم صحي نه وي او راز، راز ناروغۍ ورسره ملې وې.
