جاپان پر افغان ـ تاجیک پوله د معیشیت د ودې د پروژې(لیتاکا) د دریم پړاو تطبیق ته ژمن دی
د کلیو بیارغونې او پراختیا وزیر پوهندوی مجیب الرحمن کریمي د خپل کار په دفتر کې د جاپان له سفیر میتسوجي سوزوکا سره د لیتاکا د درېم پړاو د پیل په موخه ولیدل.
د جاپان سفیر د لیدنې په پیل کې وویل، چې د کلیو بیارغونې او پراختیا وزارت له لارې له بیوزله کلیوالو سره د جاپان هېواد د مرستو کولو میکانیزم غوره و او د دې میکانیزم په لا پیاوړتیا او وغځیدا باید کار وشي، ځکه چې د سولې د خبرو د بریالیتوب په پایله کې به افغان کډوال بیرته خپل هیواد ته راستنیږي او هم به په کور دننه بیځایه شوي خلک خپلو سیمو ته ستنیږي، نو په دې صورت کې به د کلیو بیارغونې اوپراختیا وزارت له لوري له کلیوالو سره د جاپان هیواد مرستې هم ډېرې شي.
د ښاغلي سوزوکا په وینا پر افغان تاجیک پوله پرتو سیمو کې د معیشت د ودې د پروګرام اغیزمنتیا له امله هغوی ددې پروګرام د دریم پړاو د پیل لپاره چمتووالی نیسي.
د کلیو بیارغونې او پراختیا وزیر پوهندوی مجیب الرحمن کریمي د جاپان هیواد له سفیر څخه د مننه تر څنګ زیاته کړه چې د جاپان او افغانستان ملګرتیا تاریخي ده او مرستې یې افغانانو ته د درناوي وړ دي.
د کلیو بیارغونې او پراختیا وزیر زیاته کړه په سرحدي سیمو کې د معیشت د ودې پروګرام په سیمه کې د میشتو کلیوالو د اقتصاد په پیاوړتیا کې مرسته کړې ده او د کلیوبیارغونې او پراختیا وزارت د کارکونکو د وړتیا په لوړولو کې د جاپان هیواد له همکارۍ یې مننه وکړه او ویې ویل چې د جاپان په مرسته د یاد وزارت ۴۲ تنه کارکونکو خپل تحصیلات د ماسټرۍ تر کچې رسولي دي او دا کار په وزارت کې د وړتیا د لوړیدو لامل شویدی.
