د مرکزي او ولایتي رئیسانو د همغږۍ سیمینار پای ته ورسېد
د کلیو د بیارغونې او پراختیا وزارت د مرکزي او ولایتي رئیسانو د همغږۍ درې ورځنی سیمینار نن د انټرکانټیننټال هوټل په تالار کې د کلیو د بیارغونې او پراختیا وزارت د محترم وزیر الحاج ملا عبداللطیف منصور صاحب په وینا سره پای ته ورسېد.
په یاد سیمینار کې د کلیو د بیارغونې او پراختیا وزارت مالي او اداري مرستیال الحاج مولوي عبدالرحمن حلیم، د پلان او پالیسي مرستیال مولوي شرف الدین مسلم، سلاکارانو، مرکزي او ولایتي رئیسانو ګډون کړی وو.
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب په تېر کال کې د مرکزي او ولایتي ریاستونو د فعالیتونو قدرداني وکړ او وویل: زموږ هېواد یو جنګ ځپلی هېواد دی، زموږ او تاسې مسؤلیت دی ترڅو د هېواد په لرې پرتو کلیو کې د شته امکاناتو سره سم بېلابېلې پراختیايي پروژې پلې او خپل هېواد آباد کړو.
همداراز محترم وزیر صاحب زیاته کړه چې موږ باید په خپلو چارو کې د مشرانو اطاعت او خپل کارونه د اسلامي نظام په رڼا کې ترسره کړو. باید یو منظم پلان جوړ کړو ترڅو د هغه له مخې د خپلو هېوادوالو ستونزو ته رسېدنه او په هره برخه کې ورته اسانتیاوې برابرې کړو او تاسې ټولو ته د یاد مسؤلیت د ترسره کولو او بریالیتوب هیله کوم.
د یادونې وړ ده چې په یاد سیمینار کې مرکزي او ولایتي رئیس صاحبانو د چارو لا ښه والي، ښې همغږۍ او د شته نیمګړتیاوو د هوارولو په اړه خبرې وکړې او دغه سیمینار د کلیو د بیارغونې او پراختیا وزارت د مالي او اداري مرستیال الحاج مولوي عبدالرحمن حلیم په دعائیې سره پای ته ورسېد.
