په بلخ کې د ۴.۶ میلیونه افغانیو په ارزښت د اوبو رسولو یوه شبکه جوړه شوه
د کلیو بیا رغونې او پراختیا وزارت د اوبو رسولو او کلیوالي حفظ الصحې ملي پروګرام له لوري د بلخ ولایت د نهر شاهي ولسوالۍ په بلخابي کلي کې د یونیسیف نړیوالې ادارې په مالي مرسته د ۴.۶ میلیونه افغانیو په ارزښت د اوبو رسولو یوه شبکه جوړه او ګټې اخیستنې ته وسپارل شوه.
دا شبکه ۱۵۰ متره ژوره څاه، د ۲۰ متره مکعبه په ظرفیت یوه کانکریټي زیرمه، ۳۰ سولرې ښیښې، د احاطې دیوال، ۳.۵۸۰ کیلو متره پایپ او ۸۰ نلکې لري چې په ترڅ کې یې ۱۲۰ کاري ورځې رامنځ ته شوې وې.
باید ووایو چې ددې پروژې په بشپړتیا سره ۲۵۰ کورنۍ، چې ډیری یې کورني بې ځایه شوي دي د څښاک له پاکو او صحي اوبو برخمن شول.
