په غور کې د څه باندې ۱.۸ میلیونه افغانیو په ارزښت د څښلو د اوبو یوه لمریزه شبکه ګټې اخیستنې ته وسپارل شوه
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې پروګرام له لوري د غور ولایت د دولت یار ولسوالۍ په نو اباد کلي کې د څه باندې ۱.۸ میلیونه افغانیو په ارزښت چې د یونیسف ادارې لخوا ورکړل شوې، د اوبو رسولو یوه لمریزه شبکه جوړه او د خلکو ګټې اخیستنې ته وسپارل شوه.
ددغې شبکې په جوړېدو سره د نوآباد کلي د یوه جومات او شاوخوا ۹۰ کورنیو لپاره د کور په دننه کې د څښلو پاکې اوبه برابرې شوې.
په دغه پروژه کې د ځايي خلکو لپاره شاوخوا ۱۴۰۰ کاري ورځې هم رامنځته شوې وې، د یوې چینې استحکامول، د یوې ذخیرې او یوه استنادي دیوال جوړول، د ۱۱۶۹ متره اوږدې شبکې غځول، د سولرونو او په کورونو کې د مېترونو او نلبندانونو (شیردهنونو) نصبول شامل وو.
