په کندهار کې د ولسي تړون ملي پروګرام له لوري د څه کم ۵۰۰ ميلیونه افغانیو په ارزښت پروژې پلي کیږي
نن چهار شنبه د کلیو بیارغونې او پراختیا وزیر پوهندوی مجیب الرحمن کریمي، د کندهار ولایت له والي ښاغلي حیات الله حیات سره د یاد ولایت د خلکو ستونزو او غوښتنو په اړه ولیدل.
د لیدنې په پیل کې کندهار والي د کليو بیارغونې او پراختیا وزیر سره د یاد ولایت ستونزې شریکې کړې، چې د ولسي تړون ملي پروګرام نورو ولسوالیو ته غځول، د ارغنداب په سیند له دهله بند څخه نورو ولسوالیو ته د کرنیزو کانالونو جوړول، د کرنیزو ځمکو د اوبو کولو او څښاک اوبو په موخه د شبکو جوړول او د استنادي دیوالونو جوړولو غوښتنې یې مهمې هغه وې.
د کليو بیارغونې او پراختیا وزیر پوهندوی مجیب الرحمن کریمي وویل، له دهله بند څخه به د کندهار ارغنداب، شاولي کوټ، ډنډ، دامان، ژېړۍ, میوند او پنجوایي ولسوالیو ته د کرنیزو ځمکو د اوبو کولو په موخه ۱۳۶ کانالونه جوړ شي، چې زیاته کرنیزه ځمکه به خړوب کړي او د دې ترڅنګ د ولسي تړون ملي پروګرام په لومړني پړاو کې د کندهار په سپین بولدک، پنجوایي او شګه یا تخته پل ولسوالیو کې د څه کم ۵۰۰ ميلیونه افغانیو په ارزښت د ۳۵۰ پروژو چارې روانې دي، چې د یاد پروګرام په نورو پړاونو کې به نورې ولسوالۍ هم تر پوښښ لاندې راوستل شي.
