پُلخمري ښار کې د ۲۶۰ کورنیو لپاره د څښاک پاکې اوبه برابرې شوې
دغه پروژه د کلیو د بیارغونې او پراختیا وزارت، په کلیوالي سیمو کې د اوبو رسولو او حفظ الصحې د پروګرام له طریقه، د حسین خېلو د ټولنې د پرمختیايي شورا پرمټ تطبیق شوه.
دغه شبکه د (۳میلیونه او ۸۱۹زره) افغانیو په لګښت سره چې د یونیسف ادارې لخوا ورکړل شوې، د بغلان ولایت د پلخمري ښار اړوند په حسین خېلو کلي کې جوړه او د خلکو ګټې اخیستنې ته وسپارل شوه.
د د اوبو رسولو ددغې پروژې د جوړولو په چارو کې د ۹۰ مترو په ژوروالي سره د یوې ژورې څاه کیندل، د ۸۰متره مکعب په ظرفیت سره د یوې زیرمې جوړول، د ۲۳۰۰ مترو په اوږدوالي سره د پایپونو د شبکې غځول او په کورونو کې د ۲۰۵ نل بندانونو او نلکو نصبول شامل وو.
د اوبو رسولو ددغې پروژې په تکمیلیدو سره د شاوخوا ۲۶۰ کورنیو لپاره د څښاک پاکې اوبه برابرې شوې.
