په میدان وردګو کې ۱۱.۸ میلیونو افغانیو په ارزښت د څلورو پروژو تړونونه لاسلیک شول
د کلیو بیارغونې او پراختیا وزارت په کلیوالي سیمو کې د اوبو رسولو، روغتیاساتنې او اوبو لګولو ملي پروګرام له لوري د میدان وردګو ولایت د جلریز ولسوالۍ په قول ناتي، قلعه سبز او د دایمیردادو ولسوالۍ په سوخته او جو قل سیمو کې د ۱۱.۸ میلیونو افغانیو په ارزښت د څلورو پروژو تړونونه د کلیو بیا رغونې او پراختیا سرپرست ریس انجنیر ریاض احمد خلیل له لوري د یادو سیمو له پراختیایي شوراګانو سره د ولایت د والي عبدالرحمن طارق په حضور کې لاسلیک کړل.
نوموړې پروژې د یو کال په موده کې رغول کیږي، چې په دې پروژو کې د ١٤٠٤ مترو په اوږدوالي سره د اوبو یو کانال د جلریز ولسوالۍ په قلعه سبز او قلعه کهنه سیمو کې جوړيږي، چې په راتلونکې کې به د سیمې شا او خوا ٥٠٠ جریبه کرنیزه ځمکه خړوبه کړي.
همدا راز پاتې درې نورې پروژې بیا د اوبو رسولو شبکې دي، چې یوه د جلریز په قول ناتي او پاتې دوه یې د دایمیردادو ولسوالۍ په سوخته او جوقل سیمو کې جوړیږي، چې په راتلونکې کې به له دې درېیو شبکو شا او خوا ٣١٥ کورنۍ پاکو او صحي اوبو ته لاس رسی پیدا کړي.
