په جوزجان او سرپل ولايتونو کې د پاکو اوبو رسولو (۱۴) شبکو د جوړولو چارې پیل شوې
د کليو د بيارغونې او پراختيا وزارت له لوري د جوزجان ولايت په آقچې، فیضاباد، خانقاه، خواجه دوکوه، مردیان، منګجیک ، قوشتیپې او د سرپل ولایت په سانچارک، سوزمه قلعه او ګوسفندې ولسوالیو کې د څه باندې (۲) میلیون امریکایي ډالرو په لګښت د پاکو اوبو رسولو (۱۴) شبکو د جوړولو چارې نن د دغه وزارت محترم وزير الحاج ملا محمد یونس اخندزاده صاحب او مل پلاوي له خوا د يوې غونډې په ترڅ کې پيل شوې.
په دې غونډه کې د کليو د بيارغونې او پراختيا وزارت وزير الحاج ملا محمد یونس اخندزاده صاحب، د یاد وزارت د پلان او پاليسي معين مولوي شرفالدین مسلم، مل پلاوي، د جوزجان ولايت والي الحاج گل حیدر شفق صاحب، د جوزجان د استخباراتو ریئس مولوي محمد هاشم شفیق صاحب د جوزجان او سرپل ولايتونو د کليو د بيارغونې او پراختيا رياستونو ریئسانو یو شمېر نور مسئولینو، علماء کرامو، سپینږیرو او ځوانانو ګډون کړی وو.
په دغه مراسمو کې د کليو د بيارغونې او پراختيا وزارت محترم وزیر صاحب وینا وکړه او وویل: موږ هڅه کوو چې د خپلو موجودو امکاناتو څخه په استفادې او د خلګو اړتياوو ته په کتو د هېواد په لرو پرتو سیمو کې پرمختیايي پروژې تطبیق او عملي کړو.
د يادو شبکو د کار په جريان کې به سلګونه تنه کاريګرو ته د کار زمينه برابره او په بشپړېدو سره به یې شاوخوا (۵۶۲۹) کورنۍ د څښاک پاکو اوبو ته لاسرسی پيدا کړي.
