د کلیو د بیارغونې او پراختیا وزارت له لوري د بادغیس ولایت د قادس د ذخيروي بند چاري پیل شوي
د کلیو د بیارغونې او پراختیا وزارت د سرپرست وزیر الحاج ملا محمد یونس اخندزاده او مل پلاوي له خوا د بادغیس ولایت د قادس ولسوالۍ د لوی ذخيروي بند پروژه افتتاح او عملاً یې چارې پيل شوې.
په یاد پلاوي کې د اوبو رسولو او روغتیا ساتنې رئیس مولوي بخت منیر محمد، د بادغیس ولایت د استخباراتو رئیس مولوي محمد عیسی، د بادغیس ولایت د کلیو د بیارغونې او پراختیا رئیس مولوي روزي محمد منصور، د هلمند ولایت د کلیو د بیارغونې او پراختیا ریاست رئیس ملا محمود ثانې، د قومندانۍ استازو همداراز د سیمې علماء کرامو، سپین ږیرو او مخورو په دغه افتتاح کې ګډون درلود.
د قادس ذخیروي بند یوه حیاتې پروژه ده چې د قادس سیند د اوبو مهارولو، د سیلابونو په مخنیوي او د قادس د اوبو د سرچینو په قوي کولو کې خورا رول لري. د نوموړي بند د کاسي د اوبو ظرفیت ۱.۸۲ میلیون متر مکعب دی او د ۳۲ متره په ارتفاع سره جوړیږي.
د کلیو د بیارغونې او پراختیا وزارت په پراختيايې بودیجه چې ۱۲۵۰۰۰۰۰ امریکايې ډالرو په لګښت د اوبو رسولو او روغتیا ساتني ریاست لخوا تطبیقیږي.
د دغه بند په جوړیدو سره به ۱۴۰۰ هکتاره ځمکه خړوبه شي او د سیمې ۶۰ زره اوسيدونکو ته به د زراعت په برخه کې کاري فرصتونه برابر شي.
