د کلیو بیا رغونې او پراختیا سرپرست وزیر د لوګر د والي له مرستیالې سره وکتل
د کلیو بیا رغونې او پراختیا سرپرست وزیر حیات الله حیات نن دوشنبه له غرمې وروسته د لوګر ولایت د والي له مرستیالې رابیعې ستانکزۍ او ددغه ولایت د سکتور له رییس غزني ګل ځاځي سره د خپل کار په دفتر کې ولیدل.
په دې ناسته کې په ټولیزه توګه په لوګر ولایت کې د کلیو بیا رغونې او پراختیا وزرات د کړنو او فعالیتونو پر اړه دوه اړخیزې خبرې اترې وشوې.
د لوګر ولایت استازو د کلیو بیا رغونې او پراختیا له سرپرست وزیره مننه وکړه چې د انډولیزې پرمختیا پر بنسټ یې په یاد ولایت کې ګڼې پرمختايي پروژې پلي کړي او یو شمیر یې د پلي کیدا په حال کې دي.
استازو له ښاغلي حیات هیله وکړه چې د روانو پروژو کارونه لا ګړندي او نوې پروژې هم دغه ولایت ته په پام کې ونیسي او همدا راز د پروژو د کارونو په مخ کې د شته خنډونو د لرې کولو سر بیره دې د ولسي تړون ملي پروګرام تر چتر لاندې پیل شوې ملي دسترخوان پروګرام چې د ځينو لاملونو له کبله په دې ولایت کې ولاړ دی، پیل کړي.
ښاغلي حیات د لوګر د والي مرستیالې او ورسره مله پلاوي ته ډاډ ورکړ چې د ملي دسترخوان د پروګرام د پیلولو ترڅنګ به د پروژو د پلي کیدا په مخ کې شته خنډونه لرې کوي او د انډولیزې پرمختیا د اصل له مخې به د دغه ولایت کلیو او ولسونو ته خدمت کوي چې ولسونه د ښه راتلونکي او هوسا ژوند څښتنان شي.
