د کلیو بیارغونې او پراختیا وزارت د انسټیټیوټ نوی رییس معرفي شو
د کلیو بیا رغونې او پراختیا وزارت د برنامو معین پوپل حبیبي توریالی طنین د کلیو پراختیا انستیتوت د عمومي رییس په توګه معرفي کړ. ښاغلي حبیبي وویل، چې طنین یو تکړه مدیر دی او دې کلیدي پوست ته یې د هغه په ټاکل کیدو خوښي څرګنده کړه او زیاته یې کړه، چې د افغانستان د کلیو پراختیا انسټیټیوټ د وزارت یو له مهمو برنامو څخه دی او تمه ده، چې له دې وروسته به په انسټیټیوټ کې د بنسټیزو بدلونونو شاهد وو.
د کلیو بیا رغونې او پراختیا وزارت د پروګرامونو معین د انسټیټیوټ پخوانۍ سرپرستې اغلې ناجیه خروټې د خدمتونو او کار ستاینه وکړه او پر کارکوونکو یې غږ وکړ، چې د یوې نوې ډلې په توګه د نوي مشرتابه سره کار وکړي. د یادونې وړ ده، چې طنین ددې څخه د مخه د اقتصاد وزارت د پلان جوړونې او یووالي د عمومي رییس په توګه دنده ترسره کړې ده. نوموړي له هندوستان هیواد څخه د کرنیزې سوداګرۍ او همدا ډول د کاردان پوهنتون څخه د سودا ګرۍ او نړیوالو اړیکو په برخه کې د ماسټرۍ په کچه سند لري، چې اوس د افغانستان د کلیو پراختیا انسټیټوت عمومي رییس و ټاکل شو.
