د چهارشنبه علمي شپږم سیمینار «په افغانستان کې د تلپاتې پرمختیا موخې» تر سرلیک لاندې تر سره شو
د افغانستان د کلیو پراختیا انسټیټيوټ د ( د چهار شنبه علمي) شپږم سیمینار د چهار شنبې پر ورځ ( ۱۳ کب) د اقتصاد وزارت د مسلکي معینیت د سرپرست نبي سروش په وینا سره د کلیو بیا رغونې او پراختیا وزارت د پلان او پالیسۍ د عمومي رییس او د یاد وزارت د ۱۰۰ تنو کارکوونکو په ګډون « په افغانستان کې د تلپاتې پرمختیا موخې» تر سرلیک لاندې تر سره کړ.
د کلیو بیا رغونې او پراختیا وزارت د پلان او پالیسۍ رییس شاپور عبدالرحیمزي د تلپاتې پرمختیا موخې ارزښتناکې وبللې او ویې ویل « د تلپاتې پرمختیا موخې له هغو ژمنو دي چې زموږ هیواد له نړیوالې ټولنې سره کړې دي او د وزارت هره کړنه په مستقیم یا نا مستقیم ډول له دغه ارزښتناک ملي سند سره تړاو لري»
په همدې ترڅ کې نبي سروش د تلپاتې پرمختیا، د دریمې زریزې له موخو سره یې د توپیر، او په هیواد کې د دې سند د تطابق په اړه پریزینټیشن ورکړ او ویې ویل « د نړۍ د هیوادونو تمرکز پر دې دی چې پرمختیا باید له بنسټه پیل شي، یانې باید له کلي پیل شي او بیا د هیواد او نړۍ پر کچه تطبیق شي»
باید ووایو چې د تلپاتې پرمختیا موخې سند چې د ټولې نړۍ د پرمختیا لپاره منځ ته راغلی (۲۰۱۶-۲۰۳۰ ) د دریمې زریزې د پرمختیا د موخو بدیل دی، په افغانستان کې په ۲۰۱۷ م کال کې دې سند ته له ملي شاخصونو سره تطابق ورکړل شو.
