د انرژۍ په سکټور کې دوه مهم سندونه نهایي شول

د کلیو بیارغونې او پراختیا وزارت د افغانستان د کلیو پراختیا لپاره د دوامدارې انرژۍ پروګرام (ASERD) لخوا، د انرژۍ په سکتور کې دوه نور سندونه، چې د ملګرو ملتونو پراختیايي پروګرام په تخنیکي او مالي مرسته او له ښکېلو ادارو سره په ګډه چمتو شوي دي، د مرغومي په ۱ او ۲مه نېټه په دوه ورځيني ورکشاپ کې د انرژۍ سکټور د ښکېلو لوریو له استازو سره شریک او نهایي شول.

د ورکشاپ په لومړۍ ورځ، د تجدید وړ انرژۍ تجهیزاتو لپاره د ازمایښت او د کیفیت ډاډمنتیا کاري چوکاټ، چې د یادې برنامې له لوري د ستندرد ملي ادارې سره په ګډه چمتو شوی دی، ټولو ګډونوالو سره شریک شو او د ورکشاپ په دوییمه ورځ د افغانستان د کلیو لپاره د تجدیدوړ انرژۍ د ستراتیژۍ لپاره لس کلن د عمل پلان (۱۴۰۰ – ۱۴۱۰)، چې د دوامداره انرژۍ برنامې له لوري چمتو شوی دی، ګډونوالو ته وړاندې شو.

په یاد ورکشاپ کې د انرژۍ خدمتونو د تنظیم ادارې او د افغانستان برښنا شرکت تر څنګ، د ستندرد ملي ادارې، کابل پوهنتون، د انرژۍ اتحادیې غړو، د کرنې، اوبولګونې او مالدارۍ وزارت، د افغانستان کوچنیو پورونو ټولنې او نورو ښکېلو لوریو استازو ګډون کړی و.

د یادونې وړ ده، چې دواړه سندونه د هېواد ملي سندونو او دوامداره پرمختیايي موخو(SDGs) سره په مطابقت کې چمتو شوي دي او په کلیوالي سیمو کې د انرژۍ خدمتونو او د برښنا کوچنیو پروژو د پلي کولو په برخه کې به ډېر ګټور وي.