د افغانستان د کلیوالي انرژۍ د مارکيټ د بدلون نوښت پروژې د پیل ورکشاپ جوړ شو
د افغانستان د کلیوالي انرژۍ د مارکیټ بدلون نوښت پروژې د پیل ورکشاپ د (کب په ۱۸مه) نېټه د کلیوبیارغونې او پراختیا په وزارت کې جوړ شو. یاد ورکشاپ د کلیوبیارغونې او پراختیا وزارت د پروګرامو معین، ښاغلي پوپل حبیبي، په پرانیستونکې وینا پیل شو. ښاغلي حبیبي د خپلو خبرو په ترڅ کې د چاپېریال ساتنې پر ارزښت او په دې برخه کې د تجدیدوړ انرژۍ د رول په هکله خبرې وکړې او زیاته یې کړه، "په ټوله نړۍ کې له تجدیدوړ انرژۍ څخه کار اخیستنه مخ په زیاتېدو ده. افغانستان هم د انرژۍ په برخه کې د دوامداره پرمختیایي موخو عملي کولو ته ژمن دی. موږ هیله لرو چې د کلیوبیارغونې او پراختیا وزارت لخوا د افغانستان د کلیوالي انرژۍ د مارکېټ بدلون نوښت پروژې پلي کول به یادو موخو ته د رسېدو په لاره کې ډېر ګټور ثابت شي."
د ورکشاپ نور ویناوال د چاپېریال ساتنې د ملي ادارې مرستیال ښاغلی عزت الله صدیقي، په افغانستان کې د ملګرو ملتونو د پرمختیایي پروګرام مرستیاله آغلې سورایو بوزوروکوا او د افغانستان د کلیوالي انرژۍ د مارکېټ نوښت پروژې رئیس ښاغلی محمد اجمل شینواري وو چې ټولو پخپل وار د پروژې پر ارزښت او په اغېزمنه توګه د پروژې په پلي کولو کې د ټولو اړونده ادارو د همغږۍ پر اړتیا خبرې وکړې.
وروسته، د تخنیکي ټیم لخوا د پروژې پر ټولو اړخونو تفصیلي پریزنتیشنونه وړاندې شول او د پروژې د لومړي کال کاري پلان له ګډونوالو سره شریک کړای شو.
ګډونوالو د پروژې په هکله خپلې پوښتنې او نظرونه شریک کړل چې د تخنیکي ټیم له لوري د قناعت وړ ځوابونه ورکړل شول.
د ورکشاپ موخه د انرژۍ له ښکېلو ادارو سره د پروژې د فعالیتونو همغږي وه چي پکې د چاپېریال ساتنې ملي ادارې، د انرژۍ خدمتونو د تنظیم ملي ادارې، د افغانستان برښنا شرکت، د تجدید وړ انرژۍ اتحادیې، د افغانستان د بانکونو ټولنې او نورو اړونده ادارو استازو ګډون کړی وو.
د یادونې وړ ده چې د افغانستان د کلیوالي انرژې د مارکېټ بدلون نوښت پروژه، چې ټولیزه بودجه یې نیږدې ۲۰ ملیونه ډالره ده، د زرغون اقلیم صندوق لخوا تمویلېږي او د کلیوبیارغونې او پراختیا وزارت له لوري، د ملګرو ملتونو پرمختیایي پروګرام په تخنیکي مرسته د پنځه کلونو په موده کې پلې کېږي.
تمه ده چې نوموړې پروژه به د تجدید وړ انرژۍ پروژو د پلي کولو، په کلیوالو سیمو کې د تجدید وړ انرژۍ په برخه کې پانګونې ته د مناسب چاپېریال رامنځته کولو، د مناسب حقوقي چوکاټ رامنځته کولو او د ظرفیت لوړونې فعالیتونو له لارې د افغانستان په کلیو کې د میشتو وګړو په ژوند کې مثبت اقتصادي او ټولنیز بدلونونه رامنځته کړي.
