تیره اونۍ په هیواد کې ۱۱ ښوونځي جوړ شوي او دوو نورو ښوونځيو کار بشپړتیا ته نږدی دی
د کلیو بیا رغونې او پراختیا وزارت د ولسي تړون پروګرام د اقرا پروژې تر سیوري لاندې د هرات ولایت په ادرسکن او کرخ، د بلخ ولایت په چمتال او دولت اباد، د کابل ولایت په قره باغ، د کندهار ولایت په میوند، او د خوست ولایت په مرکز او تڼيو ولسوالیو کې تیره اونۍ د ۱۱ ښوونځيو د ودانیو کارونه بشپړ شوي او د ننګرهار په چپرهار او خوګیاڼيو ولسوالیو کې د دوو نورو ښوونځيو کار پای ته نږدی دی.
دا ښوونځي ۱۲، ۱۰، ۸ یا ۶ ټولګي، تشنابونه، او د څښاک د اوبو څاه ګانې لري ددې پروژو په ترڅ کې تخنیکي او نا تخنیکي کارګرو ته ۴۰ زره کاري ورځې رامنځ ته شوي.
د یادونې وړ ده چې د جوړو شویو ښوونځيو په بشپړتیا سره ۳۵۰۰ زده کوونکو ته د ښوونې او روزنې وړ چاپیریال رامنځ ته شوی او همدا راز ۴۴۰ تنه زده کونکي به له جوړیدونکو ښوونځيو ګټه پورته کړي.
