د کلیو د بیارغونې او پراختیا وزارت محترم وزیر د (UNDP) دفتر له رئيس او مل پلاوي سره وکتل

د کلیو د بیارغونې او پراختیا وزارت محترم وزیر الحاج ملا عبداللطیف منصور نن په خپل کاري دفتر کې د (UNDP) دفتر له رئیس سټیفن روډریکس او مل پلاوي سره لیدنه وکړه.

د لیدنې په پیل کې د (UNDP) دفتر رئیس ښاغلي روډریکس د یاد دفتر د پروژو او فعالیتونو په اړه د کلیو د بیارغونې او پراختیا محترم وزیر ته معلومات ورکړل او وویل: موږ د کلیو د بیارغونې او پراختیا وزارت سره ډیرې پراختیايي پروژې په ښه کیفیت سره پلي کړي او په راتلونکي کې به هم د دغه وزارت سره په پوره همغږۍ پروژې عملي کړو.

 ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور د (UNDP) دفتر رئیس ښاغلي سټیفن روډریکس او ورسره مل پلاوي ته د ښه راغلاست ترڅنګ وویل: زموږ ځوریدلی ولس ډیر کار ته اړتیا لري، تاسې باید په خپلو پروژو کې شفافیت ته لومړیتوب ورکړئ او هغو محرومو سیمو کې پروژې پلي کړئ چیرته چې اړتیا لیدل کیږي ترڅو د خلکو ستونزې هوارې شي.

په پای کې د دواړو لوریو ترمنځ پر لا زیاتو همغږۍ ټینګار وشو.