د کلیو د بیارغونې او پراختیا وزارت د ودانیزو چارو معین د اطلاعاتو او رسنیو په مرکز کې د یاد وزارت لاسته راوړنې رسنیو ته بیان کړې.
په یاد خبري کنفرانس کې ملا نورالهادی عادل د کلیو د بیارغونې او پراختیا وزارت ویاند او د اطلاعاتو او عامه پوهاوي ریس، خبریالانو او د یاد وزارت یو شمیر کارکوونکو ګډون کړی وو.
معین صاحب د خپلي وینا په ترڅ کې څرګنده کړه چې د کلیو د بیارغونې او پراختیا وزارت کلیوالو ته د څښاک اوبو، کانالونو، پلونو او پلچکونو، کلیوالي سړکونو، د اوبو ذخیرې او د برښنا د برابرولو په برخه کې کار کوي.
همداراز معین صاحب وویل چې د کلیو د بیارغونې او پراختیا وزارت د اسلامي امارت له راتګ وروسته د کندهار ولایت په دامان ولسوالۍ کې د اسیايي بانک د ۳۵۰ میلیونه افغانیو په لګښت د اوبو رسولو (۱۱۵) پروژو کارونه پیل شوي دي، د کندهار ولایت د مرکز اړوند یوه پروژه د میان کو بند دی چې د (شپاړس میلیونه) افغانیو په لګښت یې کارونه روان دي او د (شپږ لکه لس زره) متر مکعب اوبو د ذخیره کولو وړتیا به ولري، د هېواد په اووه ویشت ولایتونو کې مو د یونیسف په مالي ملاتړ د ۳۵۷ میلیونه افغانیو په ارزښت د کلیو له پراختیايي شوراګانو سره د اوبو رسولو او حفظ الصحې د (۹۸) پروژو قراردادونه لاسلیک کړي او کارونه یې روان دي چې په تطبیق سره به یې یو لک درې اتیا زره کسانو ته د څښاک پاکې اوبه برابرې شي، همداراز له (۹) بېلابېلو موسسو سره د (۱۶) میلیونه ډالرو په ارزښت د څښاک د اوبو، حفظ الصحې او پاکوالي د پروژو تفاهم لیکونه لاسلیک کړي دي چې د هېواد په بېلابېلو ولایتونو کې به يې په تطبیق سره (۱،۲) میلیون هېوادوالو ته د پاکو اوبو او حفظ الصحې اسانتیاوې برابرې شي او په تېرو څلورو میاشتو کې ۳۳ د اوبو رسولو پروژې د هېواد په ۱۶ ولایتونو کې بشپړې شوي دي.
همدارنګه معین صاحب وویل چې د کلیو د بیارغونې او پراختیا وزارت د نورو پروژو کارونه به ډیر ژر پيل شي.
