د ننگرهار په کامې ولسوالۍ کی د ۱۶۷ میلونه افغانیو په لګښت ۱۴ کیلومتره سړک ګټې اخېستنې ته وسپارل شو

د کلیو بیارغونې او پراختیا وزارت مالي او اداري معین معراج الدین شمس او ورسره مله پلاوي د ننګرهار ولایت په کامې ولسوالۍ کې د ۱۶۷ میلونه افغانیو په لګښت قیر( اسفالت) شوی سړک ګټې اخېستنې ته وسپاره.
ښاغلي شمس وویل، چې دا سړک نږدې ۱۴ کیلومتره اوږد دی، چې په اوږدو کې یې ۶۶ پلچکونه او محافظوي دیوال هم جوړ شوی دی.
د ننګرهار مرستیال والی تمیم عارف مومند دغه پروژه د کامې ولسوالۍ د اوسیدونکيو لپاره یوه مهمه پروژه ياده کړه، چې د دې سړ ک په جوړیدو سره به نه یواځي د خلکو ترانسپورتي ستونزې هوارې شي، بلکی د سیمې کروندګرو لپاره به هم ګڼې اسانتیاوې رامنځ ته کړي چی په اسانۍ سره خپل محصولات مارکیټ ته ورسوي.
د سیمی اوسیدونکو او قومی مشرانو د دې سړک جوړیدل د کامې ولسوالۍ لپاره ترټولوګټوره پروژه وبلله ، چې ددې پروژې پرمهال سلګونو کسانو ته د کارموندلو زمینه هم برابره شوې وه.