په ۱۳۹۹ کال کې یونېسف کلیوالي سیمو ته د پاکو اوبو رسولو په برخه کې د شاوخوا ۱۰ مېلیونه ډالرو مرسته کوي
د کلیو بیارغونې او پراختیا وزیر پوهندوی مجیب الرحمن کریمي، نن سه شنبه د افغانستان لپاره د یونېسف نړیوالې ادارې نوي ټاکل شوي رئیس ابوبکر کامپو سره ولیدل.
په پیل کې د کلیو بیارغونې او پراختیا وزیر د یونېسف نوي رئیس ته د پوره همکارۍ او د ګډ کار لپاره د اغېزمنو پروګرامونو ډاډ ورکړ.
ښاغلي کریمي زیاته کړه، کلیو بیارغونې او پراختیا وزارت توانیدلی چې د یونېسف په ملاتړ روان کال له اوه سوه زره زیاتو هېوادوالو ته د پاکو اوبو اسانتیا برابره کړي.
ورپسې د ملګروملتونو له ماشومانو څخه د ملاتړ صندوق رئیس ابوبکر کامپو د کلیو بیارغونې او پراختیا وزارت له مؤثرو او باکیفیته فعالیتونه مننه او ستاینه وکړه چې له امله یې د مرستو ډېرولو او هراړخیز ملاتړ ژمنې تازه کړې.
په دې لیدنه کې د افغانستان لپار د یونېسف ادارې رئیس له کلیو بیارغونې او پراختیا وزارت سره په ۱۳۹۹ کال کې کلیوالي سیمو ته د پاکو اوبو رسولو لپاره د لس مېلیونه ډالرو مرستې ژمنه وکړه.
