په کندهار کې داوبو لګولو یو کانال بشپړ او ګټې اخستنې ته وسپارل شو
د کلیو بیارغونې او پراختیا وزارت د ولسي تړون ملي پروګرام له لوري د کندهار ولایت په پنجوایي ولسوالۍ کې د نایب خیلو پراختیایي شورا لخوا د اوبو لګونې ترڅنګ د بندونو (حقابو) جوړولو پروژه په بریالیتوب سره بشپړه شوه. د نوموړي پروژې په بشپړیدو سره د نوموړي کلي د اوبو د ویش ستونزه حل شوه او د دوی د اوبو د ضایعاتو مخه ونیول شوه. د دې پروژې لپاره ۱ میلیون او ۷۹۳ زره افغانۍ لګول شویدې چې ۱۵۶ کورنۍ ترینه ګته اخلي، د نوموړي کانال اوړدوالي ۱۸۲۰ متره دی او د حقابو شمیر ۱۹ دی چې د کلیوالو ۱۴۵ جریبه ځمکه خړوبوي. د یادونې وړ ده چې د پروژې د جوړیدو په بهیر کې ماهرو او غیرو ماهرو کاریګرو ته ۶۳۹ کاري ورځې رامنځته شویدي.
