په ننګرهار کې د ۲۳۵۰ متره اوږد کانال کار بشپړ شو
د کلیو بیارغونې او پراختیا وزارت د ولسي تړون ملي پروګرام د څارنې، ساتنې او جوړونې لپاره د پراختيايي نغدي وجهي (MCCG) برنامې له لوري د ننګرهار ولایت د شينوارو ولسوالۍ په شګۍ فارم کلي کې د ۲.۶ میلیونه افغانیو په لګښت ۲۳۵۰ متره کرنيز کانال جوړ او ګټې اخستنې ته وسپارل شو.
یاد کانال ۶۰۰ جريبه کرنيزه ځمکه خړوبوي او ۳۲۲ کورنۍ ترې ګټه اخلي چې د دې پروژې په ترڅ کې ځایي تخنیکي او ناتخنیکي کاریګرو لپاره ۴۵۲۰ کاري ورځې هم برابرې شوې.
د يادونې وړ ده، چې په شینوارو ولسوالۍ کې د ولسي تړون ملي پروګرام د څارنې، ساتنې او جوړونې لپاره د پراختيايي نغدي وجهي ( MCCG) برنامې له لوري په بېلابېلو سکټورونو کې ۹۵ پروژې منظور شوي، چې د يو شمېر هغو رغنیزې چارې بشپړې او پاتې نورې به يې په نږدې راتلونکي کې بشپړې او ګټې اخيستنې ته وسپارل شي.
