په غور کې د ۵۴ میلیونه افغانیو په ارزښت د ۲۴ کیلو متره سړک جوړولو کار پیل شو
د کلیو بیا رغونې او پراختیا وزارت د سیمه ییز پروګرام له لوري د غور ولایت د لعل او سرجنګل ولسوالۍ په سربغندي، او د قلعه کامران په ناو کلیو کې ۲۴ کیلو متره سړک د نږدې ۵۴ میلیونه افغانیو په ارزښت جوړیږي. ددې سړک په اوږدو کې ۱۰۶ پلچکونه، ۴ واشونه او ۱۸۹ متره استنادي دیوال په پام کې نیول شوي دي. دا سړک چې په ۸ برخو کې جوړیږي د یادې ولسوالۍ ۶۰ کلي یو له بل سره نښلوي.
د دې پروژې په ترڅ کې ۲۷۰۰۰ کاري ورځې رامنځ ته کیږي چې په بشپړتیا سره به یې لسګونه زره خلک له ګټو برخمن شي.
دا سړک به له یوه پلوه د سیمې د خلکو ترانسپورتي ستونزې هوارې کړي او له بله پلوه به له کروندګرو سره مرسته وکړي چې خپل محصولات پر وخت د پلور بازارونو ته ولیږدوي.
