په زابل کې د شاوخوا ۱۰۰۰ کسانو لپاره د څښاک پاکې اوبه برابرې شوې
د کلیو د بیارغونې او پراختیا وزارت د اوبو رسولو او کلیوالي حفظ الصحې ملي پروګرام له لوري د زابل ولایت د شهرصفا ولسوالۍ په آیوب کلي کې د ۲.۳ میلیونه افغانیو په ارزښت د اوبو رسولو یوه لمریزه شبکه جوړه او د ځايي خلکو ګټې اخیستنې ته وسپارل شوه.
د دې پروژې مالي لګښت د یو اس اید/یونیسف د ادارو لخوا ورکړل شو او د پروژې په تکميلېدو سره د شاوخوا ۱۰۰۰ کسانو لپاره، چې پخوا یې د څښلو لپاره پاکې اوبه نه درلودې، د څښاک پاکې اوبه برابرې شوې.
په دغه پروژه کې د یوې ژورې څاه کیندل، د ۱۳۶۱ متره اوږدې شبکې غځول، د اوبو د یوې ذخیرې او د سولرونو لپاره د یوې احاطې جوړول او ۱۲ تختې سولرونو، نلبندانونو او داسې نورو اړینو وسایلو نصبول شامل وو.
د یادې شوې پروژې د جوړولو چارو دغه راز د ځايي خلکو لپاره شاوخوا ۱۲۰ کاري ورځې هم ایجاد کړې وې.
