په تخار کې د ۱۰۸ میلیونه افغانیو په ارزښت د جوی شیخ ۱۷۵ متره پل جوړ شو
د کلیو بیا رغونې او پراختیا وزارت د لارجوړونې د ملي پروګرام له لوري د تخار ولایت د مرکز تالقان اړوند د جوی شیخ کلي ۱۷۵ متره اوږد پل، ۰.۷۵ کیلومتره اتصالي سړک یې او د سړک دواړو غاړو ته ۶۰۰ متره استنادي دیوال د ۱۰۸ میلیونه افغانیو په لګښت جوړ او ګټې اخیستنې ته وسپارل شول.
د دې پروژې په ترڅ کې ۲۴ زره کاري ورځې رامنځ ته شوې وې او په بشپړتیا سره یې د نمک اب ولسوالۍ په ګډون جوی شیخ، قریه قلعه، چقل قشلاق پاین، چقل قشلاق بالا، قریه حاجي ها، شاه بای ها، سر اسیاب، بابه خان پهلوان او تکه تویمس کلي له مرکز تالقان سره وتړل شول.
د یادولو وړ ده چې ددې پروژې بشپړتیا په تالقان ښار کې د ترافیکي ګڼې ګوڼې د کمیدو لامل شوې. نږدې ۳۴ زره او ۸۰۰ کورنۍ په مستقیم او نا مستقیم ډول له دې پله ګټه پورته کوي.
