په تخار کې د دریو ټولګټو پروژو د بنسټ ډبره کیښودل شوه
په تخار ولایت کې د کلیو د بیا رغونې او پرمختیا وزارت د سیمه ییز پروګرام له لوري د اوبو لګولو د دریو ټولګټو پروژو د بنسټ ډبره د دغه پروګرام د رییس بریالي هلالي له لوري چې ځايي اړوندو مسوولینو او ولسي استازیو یې ملتیا کوله کیښودل شوه.
د دغې پروژې په ترڅ کې د یاد ولایت د فرخار ولسوالي په کندال کلي کې د نږدې ۲۹ میلیون افغانیو په ارزښت د اوبو لګولو پوخ کانال، سربند، سوپر پسیچ ترناب او محافظوي دیوال جوړیږي.
د دغې پروژې د تطبیق پر مهال ۱۴۰۶۵ کاري ورځې رامنځته کیږي چې په بشپړیدو به یې د سیمې ۱۷۰۰۰ اوسیدونکي له دغې پروژې ګټه پورته کړي. د یادونې وړ ده چې دغه پروژه به د سیمې ګڼ شمیر کرنیزې ځمکې او باغونه نه یواځې د سیلاب له ګواښ څخه خوندي بلکې دغه ځمکې او باغونه به د اوبو لګول تر منظم پوښښ لاندې هم راولي.
