په بدخشان کې د څه باندې ۲.۷ میلیونه افغانیو په لګښت د ګابیوني دیوال د جوړیدو کار روان دی
دڅه باندې ۲.۷ میلیونه افغانیو په لګښت د کلیو د بیا رغونې او پراختیا وزارت د ولسي تړون ملي پروګرام د محافظوي دیوال د جوړولو کار د بدخشان ولایت د کران او منجان ولسوالۍ اړوند د غز کلي د پراختیایي شورا له لوري روان دی. دغه دیوال ۲۲۰ متره اوږد والی، ۲ متره لوړ والی او ۲ متره سور لري چې کار یې تر اوسه ۸۰ سلنه پرمختګ کړیدی. د نوموړي دیوال د کار په بهیر کې ماهرو او غیرو ماهرو کاریګرو ته به ۲۴۲۰ کاري ورځې رامنځته شي او د بشپړیدو وروسته به ۶۴ کورنۍ ترینه ګټه پورته کړي. د یادونې وړ ده چې دغه دیوال به ۱۲۰ جریبه ځمکه د سیلابونو له ګواښ څخه خوندي کړي.
