ملت ته د دولت د حساب ورکولو پروګرام

مفتي سید احمد مستقیم د کلیو د بیارغونې او پراختیا وزارت د کلیو د ودانیزو چارو مرستیال نن د اطلاعاتو او رسنیو په مرکز کې ملت ته د دولت د حساب ورکولو پروګرام کې د یاد وزارت د یوه کال لاسته راوړنې وړاندې کړي.

په یاده خبري غونډه کې میرزا محمد شکیب د کلیو د بیارغونې او پراختیا وزارت حقوقي مشاور، ملا نورالهادي عادل د اطلاعاتو او عامه پوهاوي رئیس او د وزارت ویاند، انجنیر اسدالله عمار د کلیوالي اوبو لګولو د ودانیزو چارو رئیس او خبریالانو ګډون کړي وو.

د غونډې په پیل کې میرزا محمد شکیب د کلیو د بیارغونې او پراختیا وزارت حقوقي مشاور وینا وکړه او وویل: له نېکه مرغه د افغانستان د اسلامي امارت له بریا وروسته، د کلیو د بیارغونې او پراختیا وزارت وکولای شو چې د خپلو فعالیتونو او د پراختیايي پروګرامونو پلي کولو ته دوام ورکړي. که څه هم مالي محدودیتونه او د کافي امکاناتو نشتوالی د دې لامل شو چې د ځینو فعالیتونو په برخه کې سکتګي رامنځته شي خو دغه وزارت وتوانېد چې په بیلابیلو سکتورونو کې د سلګونو پراختیايي پروژو پلي کولو ته دوام ورکړي او همدارنګه ډیره هڅه وشوه چې ترڅو د افغانستان په بیلابیلو سیمو کې د پراختیايي شوراګانو په همغږۍ او همکارۍ سره د مرستندویو سازمانونو او د نړیوالو مرسته کونکو مؤسسو له لارې کلیوالو ته د کار په بدل کې خوراکي توکي او د وړیا مرستو د ویش له لارې مرسته وکړي.

وروسته غوندې ته د کلیو د بیارغونې او پراختیا وزارت د ودانیزو چارو مرستیال مفتي سید احمد مستقیم خپله ارزښتناکه وینا وکړه، نوموړي د خپلي وینا په ترڅ کې څرګنده کړه چې د  کلیو د بیارغونې او پراختیا وزارت له نوم څخه معلومیږي چې په کلیو کې د رغونې او پراختیا کار کوي. دغه وزارت په کلیو کې د پاکو اوبو برابرول پل او پلچک، کلیوالي سړکان، استنادي دیوالونه، لمریزه بریښنا او داسې نور خدمات وړاندې کوي. د همدغو پروژو تطبیق په دوه ډوله پیسو ترسره کیږي، یو يې هغه پیسې دي چې د مالیې وزارت له لارې د دولت له خزانې ورکول کیږي، دوهم د بهرنیو مرسته کوونکو جهتونو پیسې دي چې د نړیوال بانک، اسیايي بانک او نورو نړیوالو ادارو له لارې له افغانستان سره په پراختیايي برخه کې مرسته کیږي.

مرستیال صاحب دغه راز وویل چې د اسلامي امارت له واک ته رسېدو سره سم بهرنۍ مرستې چې مستقیما له دولت سره په پراختیايي برخه کې کیدې، دریدلې دي چې په نتیجه کې يې هغه پروژې چې د دوی په مالي مرسته يې کار مخته روان و، اوس ولاړي دي.

غونډې ته په خبرو کې، د کلیو د بیارغونې او پراختیا وزارت د کلیو د ودانیزو چارو مرستیال همداراز وویل: له همدغو مالي محدودیتونو سره سره د کلیو د بیارغونې او پراختیا وزارت توانیدلی چې د هېواد په ۲۰ ولایتونو کې د اوبو رسولو پروژې ( ۳۴ یونیسف او ۸ د مالیې وزارت) په مالي لګښت بشپړي  او ګټې اخیستنې ته وسپاري چې په نتیجه کې يې د ۷۸۰۰۰ کسانو لپاره د څښاک پاکې او صحي اوبه برابرې کړي چې پر یادو پروژو (۱۶۰) میلیونه افغانۍ لګښت راغلی او ځايي خلکو ته ۱۰۰ زره کاري ورځې رامنځته کړي، د هېواد په ۱۵ ولایتونو کې د (۱۹۵) میلیونو افغانیو په ارزښت د اوبو رسولو د ۴۵ پروژو کار روان دی چې په تطبیق سره به يې ۱۰۰ زره کسانو ته د څښاک پاکې اوبه برابرې شي او د پوهنې او عامې روغتیا له وزارتونو سره په همغږۍ اوپه ښوونځیو  کلینیکونو کې د اوبو رسولو، حفظ الصحې او نظافت په برخه کې شپږ پروژې تطبیق کړي دي.

د غونډې په پای کې د کلیو د بیارغونې او پراختیا وزارت د کلیوالي اوبو لګولو د ودانیزو چارو رئیس اسدالله عمار وینا وکړه او وویل د کندهار ولایت په ډنډ او دامان ولسوالیو کې د ۳۰۰ میلیونو افغانیو په لګښت د اوبو لګولو د کانالونو ۱۰۰ پروژې تر کار لاندې دي، د کندهار ښار ته څېرمه د میانکو بند د اوبو ذخیره وي بند چې ۲۱۰ متره اوږدوالی لري او تقریبا د یو میلیون متر مکعب اوبو د ذخیره کولو ظرفیت لري د ١٧ میلیونو افغانیو په لګښت جوړ شو، همدارنګه د خوست ولایت په نادر شاه کوټ ولسوالۍ کې د ۶۵ میلیونو افغانیو په ارزښت ۶،۳ کیلو متره پوخ سړک جوړ شوی، د کابل ولایت د فاروق آباد سیمې د ۳ کیلو متره د پاخه سړک تخنیکي سروې او ډیزاین ترسره شوی او د خوست او پکتیکا ولایتونو د وروستیو سیلاب ځپلو سره د خیمو، ترپالونو او نور اړینو شیانو مرسته ترسره شوی ده.

همداراز اسدالله عمار وویل چې د نړیوال خوراکي پروګرام (WFP) په مالي ملاتړ د هېواد په ټولو ولایتونو کې د خوراکي توکو او نقدي پیسو مرستې ترسره کیږي، د کلیو د بیارغونې او پراختیا وزارت ولایتي ریاستونه په کامله معنی ورسره همغږۍ او همکار دي.