د کلیو د بیارغونې او پراختیا وزارت سرپرست وزیر د افغانستان لپاره د ملګروملتونو د سرمنشي ځانګړې استازې او د یوناما مشرې میرمن روزا اوتونبایوا سره وکتل
د کلیو د بیارغونې او پراختیا وزارت محترم وزیر الحاج ملا محمد یونس اخندزاده صاحب نن په خپل کاري دفتر کې د افغانستان لپاره د ملګروملتونو د سرمنشي ځانګړې استازې او د یوناما مشرې میرمن روزا اوتونبایوا او مل پلاوي سره وکتل.
په یاده لیدنه کې د یوناما مشرې میرمن روزا اوتونبایوا د لیدنې څخه خوښي څرګنده کړه او زیاته یې کړه چې دوی به افغانستان ته د بیرته راستانه شوو کډوالو ته د پاکو اوبو رسولو، روغتیا ساتنې او داسې نورو برخو کې خپلې مرستې ورسوي او همداراز يې د مرستو دوام ته اشاره وکړه.
ورپسې د کلیو د بیارغونې او پراختیا وزارت محترم وزیر الحاج ملا محمد یونس اخندزاده صاحب میلمنو ته د ښه راغلاست ترڅنګ وویل چې موږ د یوناما دفتر د دوامدارو همکاريو څخه قدرداني کوو چې په سختو حالاتو کې یې خپلې مرستې رسولي او جاري ساتلې دي او موږ به ډیر ژر د بیرته راستانه شوو کډوالو په ښارګوټي کې د پاکو اوبو رسولو شبکو د جوړولو کارونه پیل کړو.
همدارنګه ښاغلي وزیر صاحب زیاته کړه چې تاسې باید د بشري مرستو ترڅنګ بنسټیزو او عام المنفعه پروژو ته پاملرنه وکړئ او خپل کارونه د وزارت سره په هماهنګۍ ترسره کړئ ترڅو هم مسؤولیت په ښه شکل ادا شوی وي او هم ټولو هېوادوالو ته د متوازن انکشاف له مخې کار وشي.
د یادې لیدنې په پای کې دواړو لوریو پر دوامدارو همکاریو ټینګار وکړ.
