د کليو د بيارغونې او پراختيا وزارت سرپرست وزير کنړ، ننګرهار او لغمان ولایتونو ته سفر وکړ
د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده کنړ، ننګرهار او لغمان ولایتونو ته د خپل کاري سفر په ترڅ کې د یادو ولایتونو د کلیو د بیارغونې او پراختیا ریاستونو له رئیسانو او کارکوونکو سره وکتل.
د کلیو د بیارغونې او پراختیا وزارت سرپرست وزیر د دغو ریاستونو د کارکوونکو شته ستونزې او غوښتنې له نږدې واوریدې او وویل چې د پراختیا او رغونې په برخو کې خپلو ولسونو ته په اخلاص، صداقت او ایماندارۍ سره خدمت وکړئ او د ریاست دروازې تل د ولسونو لپاره خلاصې وساتئ او د ریاست اړوند غوښتنو ته رسیدنه وکړئ .
وزیر صاحب همداراز وویل چې زموږ هېواد او ولسونه زیات کار او خدمت ته اړتیا لري نو باید تل خپلې وظیفي ته په خپل وخت راشئ او درسپارل شوي کارونه مو د اسلامي ارزښتونو په رڼا کې ترسره کړئ.
