د ملي بیرغ ورځ دې نیکمرغه وي!
سبا د ملي بیرغ ورځ ده
دا ورځ د هغه بیرغ د درناوي په پار لمانځو چې د یوه لوی ملت د پایښت او غرور لپاره د لویو توپانونو مخې ته سر لوړی ولاړ دی، او ددې ملت د غرور نښانه ګڼل کیږي. هغه بیرغ چې د هر افغان د پیژندګلوۍ رنګینه او ښکلې نښه ده.
د ملتونو تاریخ د همدې ملي هویت، ملي ارزښتونو او ملي بیرغ په لوړوالي کې ځلیږي او دا نړۍ ته زموږ د پیژندګلوۍ ملي نښان دی.
که په ژوره توګه ځیر شو نو زموږ رنګین او ښکلی بیرغ د افغانانو د یو والی او پیوستون بیلګه ده، تور، سور او زرغون ..... دا یوازې رنګونه نه دي بلکې ددې رنګونو ګډون د افغانانو لپاره داسې یو بیرغ او نښه جوړوي چې په هره رپا کې یې د میلیونونو خلکو د زړه درزا او مستي ټوپونه وهي.
د دې تر څنګه د ملي بیرغ هر رنګ د افغانانو د تیراو راتلونکي مهال کیسې کوي او د هیله مندۍ نښه بلل کیږي.
تور: د هیواد د پرلپسې ګډوډیو د تورو شپو یادونه تازه کوي.
سور: د هغه زړورو خلکو د میړانې، زړورتیا او شهادتونو یادښت بلل کیږي چې هیڅکله یې د ظلم بار نه دی منلی.
شین: هیله ده، زیری دی او د هغه سمسور او سوله ییز سبا زیری دی چې ډیر ژر به راورسیږي.
د ملي بیرغ ورځ دې نیکمرغه وي!
