تېر مالي کال کې ۲۳۹۱ پروژې په ټول افغانستان کې تطبیق شوي دي
د کلیو بیارغونې او پراختیا وزیر نن شنبه د حکومت د رسنیو مرکز کې د یوې خبري ناستې پرمهال د تېر مالي کال په جریان کې د ترسره شویو فعالیتونو او راتلونکو پلانونو په اړه د رسنیو له لارې ولس ته حساب ورکړ.
پوهندوی مجیب الرحمن کریمي وویل، د کلیو بیارغونې او پراختیا وزارت له لوري د تېر مالي کال په اوږدو کې په ټول هېواد کې ۲۳۹۱ پرمختیایي پروژې پلي شوې، چې په کاري بهیر کې ۳،۴ ميلیونه کاري ورځې درنو هېوادوالو ته برابرې کړې او ۳،۵ ميلیونه خلک له دې پروژو څخه ګټه اخلي.
د کليو بیارغونې او پراختیا وزیر زیاته کړه، په ټول هېواد کې د ۸۱۰۵ نورو پرمختیایي پروژو چارې روانې دي، چې تر بشپړیدو پورې به ۱۱ ميلیونه کاري ورځې ایجاد او ۱۰،۳ ميلیونه هېوادوالو ته به اړینې اسانتیاوې برابرې کړي.
ښاغلي کریمي زیاته کړه، د کرونا وبا او ځينو ستونزو سره سره وزارت په دې وتوانید چې د ۱۳۹۹ مالي کال په پیل کې ۲۵ ميلیارده افغانۍ ترلاسه کړې کلنۍ بودیجه ټوله په انډولیزه بڼه مصرف او د کال په نیمایي کې ۵ میلیارده افغانۍ نوره بودیجه ترلاسه کړي، چې له هغې جملې هم نیږدې دووه میلیارده افغانۍ مصرف شوې ده.
