په فاریاب کې څه باندې ۱۹ میلیونه افغانیو په لګښت د ۴ ښوونځیو د جوړولو کار پیل شو
د کلیو د بیارغونې او پراختیا وزارت د ولسي تړون ملي پروګرام له لوري د څه باندې ۱۹ میلیونه افغانیو په ارزښت د اقراء پروګرام تر سیوري لاندې د څلور ښوونځیو د ودانیو د جوړیدو کار په فاریاب ولایت کې رسماً پیل شو. له دغو څلورو ښوونځیو څخه دوه یې ۸ ټولګي او دوه نور یې ۶ ټولګي لرونکي دي. دغې ښوونځي به د قرغان ولسوالۍ په کارګز خانه کشکتان کلی، د اندخوی ولسوالۍ په سولدوز کلي، د قرمقول ولسوالۍ په آلتي بولت بولک قاضی کینت کلي او د خانچهار باغ ولسوالۍ په قلغهٔ نیستان کلي کې جوړ شي. د یادونې وړ ده، چې ددغو ښوونځیو په جوړیدو سره به ۵۹۰۱ زده کوونکو لپاره زده کړو وړ چاپیرل برابر شي.
