د کلیو د بیارغونې او پراختیا وزارت له لوري په فراه ولایت کې د کج صمد ستر بند د تحقيقاتو چارې پيل شوې
د کلیو د بیارغونې او پراختیا وزارت له لوري د هېواد په فراه ولایت کې د شاوخوا دوه میلیارده افغانیو په لګښت د کج صمد د اوبو ستر بند د تحقيقاتو چارې نن د یوې غونډې په ترڅ کې د دغه وزارت د سرپرست وزیر الحاج ملا محمد یونس اخندزاده او مل پلاوي له خوا پیل شوې.
په دې غونډه کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده، مل پلاوي، د نیمروز ولایت والي شیخ محمد قاسم خالد صاحب، د هلمند ولایت والي مولوي عبدالرحمن بلال صاحب، یو شمیر نورو مسؤولینو، د سیمې علماء کرامو، سپین ږیرو، مخورو او ځوانانو ګډون کړی وو.
د یاد بند د تحقيقاتو د پرانیستلو پرمهال د کلیو د بیارغونې او پراختیا وزارت سرپرست وزیر د دې سترې ملي پروژې د اقتصادي او ټولنیزو ګټو پر اهمیت خبرې وکړې.
دغه بند چې تقریباً (۵۶) متره لوړوالی او د (۱۴۰) میلیون متر مکعب اوبو ذخیره کولو وړتیا لري د فراه او نیمروز ولایتونو په یوې سترې وچې سیمه کې موقعیت لري او د دې وچې او بې اوبو سیمې لپاره حیاتي ارزښت لري.
د یاد بند د کار په جریان کې به زرګونه تنه کاریګرو ته د کار زمینه برابره او په بشپړیدو سره به یې (١٤٠٠۰) هکټاره کرنیزه ځمکه خړوبه شې.
