په ننګرهار ولایت کې د پاکو اوبو یوه شبکه جوړه او ګټې اخیستنې ته وسپارل شوه

د کلیو د بیارغونې او پراختیا ریاست تر چتر لاندې، د یونیسف ادارې په مالي مرسته او د کوار مؤسسې په تخنیکي همکارۍ د ننګرهار ولایت د چپرهار ولسوالۍ په مندرخیلو سیمه کې د 7،9 میلیونه افغانیو په مالي لګښت د پاکو اوبو یوه شبکه جوړه او ګټې اخیستنې ته وسپارل شوه. د ننګرهار ولایت د کلیو د بیارغونې او پراختیا رئیس مولوي قسمت الله مبارز وویل: یاده شبکه د ۴۰۰۰ مترو په اوږدوالي سره د سیمې ۳۸۳ کورنیو سربیره به یوه ښوونځي او مدرسې ته د اړتیا په اساس پاکې اوبه ورکوي چې ټولې چارې یې د ۷ میاشتو په موده کې بشپړې شوې او په ورځني ډول ۲۵ کسانو ته د کار زمینه هم برابره شوې وه. مولوي مبارز د کلي اوسیدونکو ته په خپلو خبرو کې وویل چې مونږ ټول په خپلو برخو کې مسؤلیت پذیره یو ،زمونږ مسؤلیت دا وه چې په کمو امکاناتو مو ستاسې اړتیا ته پاملرنه وکړه او د اوبو شبکه مو درته جوړه کړه خو ستاسې مسؤلیت یې ساتنه او څارنه ده، که مو سمه ساتنه ورڅخه وکړه نو زیات وخت لپاره به پدی برخه کې ستونزه ونلرئ او د پاکو اوبو څخه به برخمن ووسئ.