په ننګرهار کې ۲۲۰ تنه زده کوونکو ته د زده کړې مناسبه زمینه برابره شوه.
په ننګرهار ولایت کې۲۲۰ تنه زده کوونکي د یوه ښوونځی په جوړیدو سره د زده کړې له مناسب چاپیریال څخه برخمن شول. دا ښوونځی چې ۸ درسي خونې،۱ اداري خونه،۵ تشنابونه او د څښاک د پاکو اوبو یوه څاه لري د ننګرهارولایت د کوز کونړ ولسوالۍ اړوند د ګارمیلا کلي پراختیایي شورا لخوا یې کار بشپړ شویدی. دغه ښوونځی د کلیو بيا رغونې او پراختیا وزارت، د ولسي تړون ملي پروګرام له لوري د اقرأ پروژې تر سیوري لاندې د نجونو او هلکانو د زده کړې لپاره جوړ شوېدي. د دې ښوونځي د جوړېدو په ترڅ کې تخنیکي او نا تخنیکي کاریگرو ته ۲۷۶۲ کاري ورځې رامنځته شوېدي. د یادونې وړ ده، چې په کوز کونړ ولسوالۍ کې د اقرا برنامې له لوري ۱۷ بابه ښوونځيو ته د ودانيو جوړول منظور شوي، چې رغنیزې چارې يې په چټکۍ سره جریان لري او په نږدې راتلونکې کې به بشپړ او ګټې اخيستنې ته وسپارل شي.
