په لغمان ولایت کې د کلیوالي اقتصاد د پياوړتیا ملي پروګرام د فعالیتونو بهیر
د کلیو د بیارغونې او پراختیا وزارت د کلیوالي اقتصاد د پياوړتیا ملي پروګرام دا ځل د خپلو فعالیتونو په ترڅ کې د لغمان ولایت د مرکز مهترلام د پور او سپما ۳ کلیوالي اتحادیو ته بانکي حسابونه پرانیستل.
همدا راز، د لغمان ولایت په ۱۵۰ پرمختیایي شوراګانو کې ۱۴۲۲ سپماګروپونه جوړ شوي، چې ۸۰٪ سلنه یې د مېرمنو دي. یادو سپما ګروپونو تر اوسه څه دپاسه درې میلونه افغانۍ سپمولي، چې نږدې ۲ میلونه یې د حسنه پور په توګه د کوچنیو او منځنیو تشبثاتو د پیل او د اقتصادي چارو د پیاوړتیا په موخه د ګروپونو غړیو ته ورکړل شوې دي.
د یادونې وړ ده چې په دې ولایت کې تر اوسه له ټولو سپما ګروپونو څخه د پور او سپما ۵۷ کلیوالي اتحادیې هم تشکیل شوې دي.
