په تیره یوه میاشت کې په ننګرهار کې ۴۲۰ متره غالۍ اوبدل شوي
د ننګرهار کلیو بیارغونې او پراختیا ریاست د میرمنو کلیوالي اقتصاد د پیاوړتیا ملي پروګرام (WEERDP ) له لوري د ننګرهار په سره رود، کامې، روداتو،دره نور ، چپرهار ولسوالیو او د ننګرهار په مرکز جلال اباد ښارکې ۷۰ غالۍ اوبدونکی له مارکیټ سره وصل شوي او نږدي ۴۲۰ متره غالۍ یی اوبدلې دي.
د کلیوالی اقتصاد پیاوړتیا ملي پروګرام له لوري او سمهال په ننګرهار کې په سلګونو میرمنې د غالیو اوبدلو په صنعت بوختې شوې دي چې د تیرې یو ې میاشتې په ترڅ کې یې په بیلابیلو سایزونو (اندازو) کې ۵۵ غالۍ اوبدلې دي.
ددې پروګرام موخه د میرمنو کلیوالي اقتصاد پیاوړتیا او هغوی ته کارموندنه ده ترڅو میرمنې وکولای شي له همدې لارې خپلې اقتصادي اړتیاوې پوره کړي.
د کلیوالی اقتصاد پیاوړتیا ملي پروګرام نه یواځی میرمنو ته د غالۍ اوبدلو صنعت زده کوي بلکې دوی ته د مارکیټ موندلو، چاپیریال ساتنې او د سو داګرۍ پراختیا په برخه کې هم زده کړې ورکوي چی له کبله یې ننګرهار کې صنعتکارې میرمنې او غالۍ اوبدونکی توانیدلي چې خپل لاسی صنایع ان نړیوالو مارکیټونو ته هم ورسوي.
د یادولو وړده چې په ننګرهار کې ددې پروژې د پيل راهیسې نږدې ۴۵۰۰ متره غالۍ اوبدل شوي چې ۱۱.۲ میلیونه افغانۍ عاید ورڅخه ترلاسه شوی دی.
