د ماليې او د کليو بيارغونې او پراختيا وزارتونو ګډ نندارتون
د کليو بيارغونې او پراختيا وزارت د کليوالي اقتصاد د پياوړتيا ملي پروګرام لهخوا د ماليې وزارت په غوښتنه د ياد وزارت په انګړ کې د يوې ورځې نندارتون جوړ شو. د نندارتون د پرانستغونډې په مراسمو کې د ماليې وزارت سرپرست وزير ښاغلي محمد همايون قيومي، پخپلو خبرو کې د ښځو مقام او کردار ته په ټولنه کې اشاره وکړه او زياته يې کړه، چې د داسې نندارتونونو جوړول د ښځو د اقتصادي پياوړتيا لپاره ګټور تماميږي، سرپرست وزير ټينګار وکړ، چې د مالي وزارت د ښځينه متشبثينو د اقتصادي ځواکمنتيا لپاره ژمن دي. په دې نندارتون کې چې د کليوالي اقتصاد د پياوړتيا ملي پروګرام ۳۰ تنه ښځينه متشبثينو ګډون کړي وو، د هېواد له ۸ ولايتونو (هرات، بلخ، باميان، ننګرهار، خوست، پکتيا، پروان او کندهار) څخه راغلي وې. لاسي صنايع لکه: ټغرونه، قيمتي کاڼي، زيوارت، د لبنياتو خوراکي توکي، ترشي، البسه هغه توليدات وو، چې د کليوالي اقتصاد د پياوړتيا ملي پروګرام د ښځينه متشبثينو لهخوا په ياد نندارتون کې نندارې او پلورنې ته وړاندې شوي وو. يو شمېر ښځينه متشبثينو چې په دې نندارتون کې ګډون کړې وو، د دولت د وزارتونو ترمنځه يې د داسې نندارنونو په جوړولو خوښي څرګنده کړه او زياته يې کړه، چې د دولت د وزارتونو ترمنځه مرستې او له ښځينه متشبثينو څخه ملاتړ کولاي شي په اقتصادي خپلواکۍ کې له کليوالي مېرمنو سره مرسته وکړي. د پام وړ ده، چې ياد نندارتون د ښځو پر وړاندې د تاو تريخوالي د منعې په موخه د شپاړس ورځني کمپاين په تسلسل کې د مالي وزارت په غوښتنه د کليو بيارغونې او پراختيا وزارت د کليوالي اقتصاد د پياوړتيا ملي پروګرام لهخوا جوړ شوي و.
