د کلیو بیارغونې او پراختیا وزارت او د افغانستان بانک تر منځ د مقطعې پانګې د انتقال په موخه توافقلیک لاسلیک شو
د کلیو بیارغونې او پراختیا وزارت او د افغانستان بانک تر منځ د ۳۶مېلیونو ډالرو په ارزښت د «مقطعې پانګې» یو توافقلیک لاسلیک شو.
د کلیو بیارغونې او پراختیا وزیر مجیبالرحمن کریمي د دې توافقنامې د لاسلیک پر مهال وویل: «د دې توافقنامې په پایله کې به د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام WEERDP له لوري په انتخاب شویو کلیو کې د پور او سپما کلیوالي اتحادیو ته بانکې حسابونه پرانیستل شي؛ د دې حسابونو شمېر ۵۰۰۰ ته رسېږي، چې د دې اکاونټونو له لارې به ۳۶مېلیونه ډالر د بلاعوضه مرستو په توګه ۳۴ ولایتونو ته انتقال شي.»
د افغانستان بانک سرپرست رییس ښاغلي عتیق نوشېر د توافقلیک د لاسلیک پر مهال وویل: «دا توافقلیک د دوه اړخیزو مرستو لپاره لاسلیک کېږي، چې عمده ګټه يې د کلیوالو مالي علم یا Financial literacy لوړول دی.»
د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام تمه لري، چې د دې توافقلیک په لاسلیکولو سره وکولای شي چې د پروګرام هغه هدف چې په کلیوالي سیمو کې د بېوزله مېرمنو اقتصادي او ټولنیزه کچه لوړول دي، لاسته راوړي او د هېواد په اقتصادي پرمختیا کې رغنده رول ولري.
