د هیواد د خپلواکۍ د سلمې کلیزې په ویاړ د کلیوالي صنایعو نندارتون پرانستل شو
د هیواد د خپلواکۍ د سلمې کلیزې د نمانځلو په ویاړ د کلیوالي صنایعو رنګین نندارتون د یو لړ مراسمو په ترڅ کې د کلیو بیارغونې او پراختيا وزیر پوهنل مجیب الرحمن کریمي، د ولسمشرۍ ماڼۍ د چارو د ادارې د عمومي مشر عبدالوحید قتالي، د کرنې اوبو لګولو او مالدارۍ وزیر نصیر احمد دراني له خوا د کابل په چهلستون بڼ کې پرانيستل شو.
دا نندارتون به ددریو ورځو لپاره(۹-۱۱ زمری) د نندارچیانو پر مخ پرانستی وي، چې په کې د هیواد متشبیثینو او په ځانګړي ډول ۱۸۰ تنو ښځو متشبیثینو خپل لاسي او وطني تولیدات په ۲۰۰ ننداریزو غرفو کې نندارې او خرڅلاو ته اېښي دي. په نندارتون کې ۱۹۰ ننداریزې هټۍ (غرفې ) د لاسي صنایعو او ۱۰ نورې د خوراکي توکیو دي.
دا د هیواد په کچه لومړنی نندارتون دی چې متشبیثو ښځو په کې له ټولو ۳۴ ولایتونو څخه برخه اخيستې او خپل لاسي توکي او نور تولیدات یې خرڅلاو ته اېښي.
