په کونړ کې د څه باندې ۱ میلیون افغانیو په ارزښت د نجونو د یوې لېسې لپاره د څښاک پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې د پروګرام له لوري د کونړ ولایت د شیګل ولسوالۍ اړوند په «شینکړک» د نجونو په لېسه کې د اوبو رسولو یوه لمریزه شبکه جوړه او ګټې اخیستنې ته وسپارل شوه.
د څښاک د اوبو په دغه شبکه باندې څه دپاسه یو میلیون افغانۍ لګښت وشو چې د یونیسف ادارې لخوا ورکړل شو. ددغې شبکې په جوړېدو سره د شاوخوا ۱۲۰۰ ښځینه زدهکوونکیو او ګڼو استادانو لپاره د څښاک پاکې اوبه برابرې شوې.
د اوبو رسولو په دغه پروژه کې د یوې ۱۰۰ متره ژورې څاه کیندل، د یوې ذخیرې جوړول، د لسو تختو سولرونو او نورو اړینو وسایلو نصبول شامل وو.
د پروژې د جوړولو چارو دغه راز د ځايي خلکو لپاره شاوخوا ۱۲۰ کاري ورځې هم ایجاد کړې.
