په کندز ولایت کې د بيا راستنېدونکو کډوالو لپاره د څښاک پاکو اوبو رسولو يوې شبکې د بنسټ ډبره کيښودل شوه
د کلیو د بیارغونې او پراختیا وزارت له لوري د کندز ولایت په چهار درې ولسوالۍ کې د بيا راستنېدونکو کډوالو په ښارګوټي کې د څښاک پاکو اوبو رسولو یوې شبکې د جوړولو بنسټ ډبره د څه باندې (۳) ميليونه افغانيو په لګښت د دغه وزارت محترم وزیر الحاج ملا محمد یونس اخندزاده صاحب له خوا کېښودل شوه.
په دې مراسمو کې د کلیو د بیارغونې او پراختیا وزارت محترم وزیر الحاج ملا محمد يونس اخندزاده صاحب، مل پلاوي، د کندز ولایت د کلیو د بیارغونې او پراختیا رئيس مولوي اسدالله حامد، یو شمیر نورو مسؤولینو، علماء کرامو، سپین ږیرو او ځوانانو ګډون کړی وو.
په یاده شبکه کې د (١٣٠) مترو په ژوروالي د یو څاه کيندل، د (٢٢) سولر تختو نښلول او د (٢٠) متر مکعب په وړتیا د پاکو اوبو یوې زخیري جوړول شامل دي.
د دې شبکې د کار په جریان کې به لسګونه تنه کاریګرو ته د کار زمینه برابره او په بشپړیدو سره به يې د نوموړي ښارګوټي (۳۰۰) کورنۍ د څښاک پاکو اوبو ته لاسرسی پیدا کړي.
